رواية امبراطورية الرجال بقلم رحاب إبراهيم

11 سبتمبر 2020

خطوة يتبعها أخرى حتى دلفت فتاة تدعى"حميدة" إلى مكتب كبير بأكبر الشركات للاستيراد والتصدير..عملت منذ عام تقريبًا وبذلك الوقت وقعت بغرام "يوسف الزيان" وهو أحد ملاك هذه الأمبراطورية..إمبراطورية عائلة الزيان التي اكتسبت الثراء والارستقراطية منذ عهود ولِت..ولجت بداخل المكتب لرئيس الشركة والمسؤول الأول عن جميع الأفرع التابعة لمقر الفرع الرئيسي بالقاهرة..تنحنحت حميدة بإرتباك وهي تعدل نظاراتها الطبية على عيناها ، بينما لم يضعها مظهرها البائس الذي يشبه مظهر الرجال الا موضع التوتر وانعدام الثقة بالنفس ، ليلتفت رجل اقترب على الخمسين من عمره ولكنه لا زال يحتفظ ببهائه وطلته الساحرة..وما العجب في ذلك فعائلة الزيان يعرف عن رجالها الوسامة الفائقة..هو "وجيه الزيان" أشهر رجال الأعمال العزاب..كأن المرأة لم تشغر حيذ بتفكيره ولو انشاً!! استدار اليها بعدما كان يقف شارداً أمام النافذة وتساءل:

_ آنسة حميدة..وصلني أنك عملتي مشكلة مع عميلة عندنا بسبب يوسف أبن أخويا مراد الله يرحمه..ممكن أعرف اللي حصل؟
ازدردت حميدة ريقها بخوف وايقنت أنها على وشك الطرد أو ربما تم القرار بالفعل وينتظر فقط المناقشة..قالت بتلعثم :
_ بصراحة..بصراحة..هي اتفقت معاه على غداء عمل في مطعم عشان تتكلم معاه وتفهم منه كذا نقطة..مستر يوسف مش بيروح يقابل عميل غير لما اكون موجودة معاه..هي مرحبتش بيا نهائي وعاملتني بطريقة بشعة لمجرد أني حضرت وكأن دي مش مقابلة شغل !!
تفحص الرجل مظهرها عن كسب وتعجب لماذا اختارها يوسف عن غيرها لتكن مساعدته الشخصية بينما لا شيء بها يشجع على الحماس أو العمل فقال:
_ وبعدين؟ أنا عايز أعرف رد فعلك أنتِ كان إيه؟
أجابت حميدة بأقتضاب:
_ زعلت طبعاً..المفروض أن دي مقابلة شغل مش.....
حسها وجيه كي تتابع فهو على علم مسبق بما قالته وعندما رأى حيرتها أجاب عنها بعصبية :
_ مش اتنين ضاربين ورقة عرفي وبيتقابلوا من ورا الناس..مش ده اللي قولتيه؟!
احتدت نبرة حميدة بإنفعال وقالت:
_ هي اللي حسستني بكده يا فندم..ده أنا لسه بكلمها عن الشغل لقيتها شدت يوسف كده..اااقصد مستر يوسف..واترمت في حضنه البجحة وعايزة ترقص..لو حضرتك مكاني هتسيبها؟
هز وجيه رأسه وهو يخفي ابتسامته وأجاب:- والله كنت سيبتها..
صرت حميدة على أسنانها بغيظ وهتفت:
_ لو حضرتك عايزني اعتذرلها فأنا آسفة مش هقدر...استقيل ولا أني اعتذر لواحدة زي دي!!
صمت وجيه وهو يرمقها بعمق وتعابير وجهه لا توضح شيء..تحرك ليجلس أمام مكتبه وهي تئز قلق وخوف من احتمال طردها من العمل..وأكثر ما يؤلمها بذلك ليس الراتب بل الابتعاد عن حبيبها..قال وجيه ببطء:
_ ارجعي لشغلك على ما اقرر هعمل معاكي إيه..كل الاحتمالات موجودة..
ادمعت عين حميدة بيأس ولكن النظارة الطبية كان حائل بينها وبين رؤية ضعفها للعيان..
كادت أن تخرج من المكتب حتى دلف يوسف سريعاً وهو يقضم ساندوتشه وقال بعصبية:
_صباح الخير يا عمي..حميدو ما عملش حاجة!
ضمت حميدة شفتيها بغيظ منه فهو لم ينفك منادتها وكأنها صديق رجل له..لم يعتبرها مرة واحدة أنثى ولم يلتفت اليها كأمرأة ولو بنظرة..راقبها وجيه بنظرة ضاحكة وخفية ليشير لها بالخروج..نظر يوسف لحميدة بتوجس من عصبيتها وعاد جملته بعدما خرجت:
_ حميدو معملش حاجة يا عمي..البت الملزقة اللي اسمها كارين هي اللي شبطت فيا..واتحمرشت
اتسعت عين العم وجيه بتعجب وتساءل: اتحمرشت؟ يعني ايه؟!
أجاب يوسف وهو يأكل من ساندوتشه بنهم وقال موضحاً:
_ يعني اترمت عليا وأنا مش بتاع بنات..أنا بتاع ساندوتشات..
قال العم "وجيه" بيأس : أنت لا نافع في شغل ولا نافع في ارتباط ومش بشوف وشك غير وأنت بتاكل !! تصدق أن فعلًا حميدة لايقة عليك..متخلفين شبه بعض!!
أشار يوسف بتحذير: حميدو ياعمي..مابحبش حد يقول حميدة !!
ابتلع العم سيل الشتائم بفمه ثم قال: ولاد عمك فين؟ مش موجودين صح؟! اخواتي خلفوا عاهات وسابهوالي !
ابتلع يوسف الطعام بفمه بتكشيرة كالطفل وقال: الله يرحمهم بقى يا عمي بتفكرني بالحادثة دي ليه!! بتحب تنكد عليا ليه!! اكيد أنت قاصد تسد نفسي ؟!
اطرق العم على مكتبه بغضب وهتف: دور عليهم وبلغهم أن في اجتماع ليهم بكرة الصبح..تكونوا عندي هنا الساعة ٨ بالضبط..
أومأ يوسف بالايجاب ثم خرج من المكتب..
**بطرقة طويلة بها عدة مكاتب متراصة بصفوف منتظمة**
توجه يوسف لمكتب حميدة مباشرة..اخفض رأسه وقال بخفوت: ما تزعلش يا صاحبي..جبتلك حقك
رفعت حميدة رأسها الذي كان بين يديها وضربت المكتب بقبضتها وقالت: ياااا اخي أنت إيه؟! هي البسطرمة سدت نفوخك ؟! وعمت عنيك!! انا حميدة مش حميدو..أنا بنت مش ولد..سكرتيرتك مش صاحبك!!
ضيق يوسف عيناه كالطفل المعاقب..وقال: أنا ماليش صحاب واعتبرتك صاحبي..أنا مرتاح كده..عموماً أنا خارج كام ساعة كده..معاكي ساندوتشات؟
رفعت حاجبيها بعصبية ليقل مصححاً: خلاص مش جعان!
فتحت حقيبتها وأخرجت علبة صغيرة ودفعتها بين يداه فهي احياناً تشعر وكأنها أمه..قالت: معايا..خد اهيه
ابتسم وهي يتفحص الطعام وقال: الله..كبدة وسجق..ربنا ما يحرمني منك يا حميدو قلبي..
فرحته كانت طفولية فابتسمت رغماً عنها..ذهب من أمامها فهاجرتها الابتسامة مرة أخرى..إلى متى سيظل هكذا لا يشعر بها؟ لا يرى فيها سوى صديق!! ليته يراها حتى كصديقة!
*****
أسفل عدسات الكاميرا..بأحد الاستديوهات..وقف رعد يتفحص كاميرته حتى اتت إليه فتاة تعمل عارضة أزياء..ولكنها الآن تصور إعلان لمنتج خاص بالبشرة بماركة شهيرة..تغنجت بخطواتها وتنورتها القصيرة وهي تتوجه إليه..وضعت يدها على كتفه وهزت رأسها بدلال قائلة: وحشتني يا بيبي..كنت فين بقالك فترة؟!!
ابتسم رعد بسخرية وقال دون أن ينظر لها فما من معشوقة أكثر من تلك الكاميرا بيده..منذ صغره وهو مفتون بالتصوير وعدسات الكاميرات ولكن العم وجيه يرى أن ذلك العمل" تافه" ولا يصلح لأحد أبناء عائلة الزيان..أجاب رعد: كنت مشغول شوية..
اقتربت الفتاة من خده هامسة: بقولك وحشتني !!
تحركت عيناه من الكاميرا اليها ثم قال بسخرية: ده قبل سهراتك بتاعت بليل ولا بعد؟! شيليني من دماغك يا تيما..دماغي مش فيكي..
لوت شفتيها بحدة وعصبية وقالت: اومال دماغك فين! في حتت الحديدة دي؟!
أشار لها بتحذير: خلي بالك تغلطي مش هسمحلك!! وبعدين انا دماغي لسه فاضية..ومافيش واحدة قدرت تدخلها..
مطت تيما شفتيها بتعجب وتساءلت : ومواصفاتها ايه بقى؟ فتاة احلامك.
رفع رعد حاجبيه بدهشة وأجاب : تصدقي عمري ما سألت نفسي السؤال ده؟!! مش بفكر أصلا ارتبط..بس اكيد يعني هتكون بنت مالهاش زي..
كادت أن تتحدث لتتفاجئ بوجود شاب انيق يشبه بعض الشيء ذلك الذي سيقودها للجنون..ومثلها مثل غيرها لن تستطيع أن تلفت نظره ولو قليلاً..وقف يوسف ينظر لرعد لبرهة ثم قال:
_ أنت امتى هتفتح تليفونك؟ مافيش مرة بتصل بيك بلاقيك متاح!
علق رعد حامل الكاميرا على رقبته وأجاب:
_بشتغل يا يوسف ومش فاضي لتليفونات!! اكيد في حاجة حصلت بخصوص عمك!! لخص وانجز ورايا تصوير
تنهد يوسف بعمق وقال: عمك عاملنا اجتماع بكرة وانا قلقان..لازم نتكلم النهاردة كلنا قبل اجتماع بكرة..
قال رعد بموافقة: ماشي..أنا هرجع بدري ومش هتأخر..هكون في القصر على الساعة عاشرة كده..
اندهش يوسف : هو ده بدري!!
رعد بعصبية: هي دي مواعيدي..لو مش عايز تستناني أنت حر!!
قال يوسف مرغماً: هستناك..اوعى تتأخر
لوح له رعد وقد عاد لعمله بتركيز مع جلسة تصوير مع عارضة أخرى..
*****
بمبنى فخم بأحد الأحياء الراقية بالقاهرة..دق جرس أحد الشقق بعمارة سكنية..توجه بطوله الفارع وصدره العاري ليفتح الباب حتى ارتمت على صدره فتاة بملابس شبه عارية..ابتسم لها بلهفة وقال:
_ مستنيكي بقالي كتير...
قال ذلك وهو يغلق الباب بقوة ، تمايلت الفتاة التي تدعى"توتو" بمياعة وقالت وهي تلف يدها حول رقبته العارية وتتفحصه بشوقه :
_ وحشتني يا جاسر...أنت تعرف أني مابقتش اقابل حد من يوم ما عرفتك؟ كل صحابي مستغربين بس أنا عارفة السبب
جذبها أكثر الى صدره برغبة فلم يغضبه حديثها فبالنهاية هي فتاة ليل مثل غيرها ولكنه يروقه مدحها به فقال بمكر : ايه السبب ؟
نظرت له وهي تتأمله ببطء وبإعجاب شديد وقالت: كل اللي عرفتهم حاجة..وأنت حاجة تانية خااالص..اللي تعرفك مستحيل تعرف غيرك
ابتسم بثقة فليست أول إمرأة تقل عنه هذا..جميعهنّ قالن ذلك..بعد لحظات قد انتهى الحديث الى غرفة النوم..مثلما كان دائماً..ومثلما أصبح منذ سنوات..شاب لا يعرف بالحياة سوى المجون وفتيات الليل..هذه الشقة قد شاهدت الكثير منهنّ..
بعد مرور بعض الوقت كان يقف أسفل المياه بالحمام الخاص بغرفة النوم..يشعر بشيء يضيق عليه الصدر...يتلهف للخطأ برغبة جامحة ثم يعود نادماً..جرت المياه على ملامحه الشديدة الوسامة..وجسده الفارع الرياضي المفتول العضلات..خرج وهو يجفف شعره وحول خصره منشفة أخرى بيضاء..تأملته الفتاة بابتسامة راضية وقالت وهي ترتدي ثوب نوم قصير :
_ اجلت السفر عشان اجيلك النهاردة..
القى المنشفة على مد ذراعه وقال دون ادنى نظرة لها : طيب
ضيقت الفتاة عيناها بتعجب واقتربت له متساءلة : مالك يا جاسر ؟! أنت بقالك فترة متغير!! أول ما بتشوفني بحس أن مافيش حد فرحان اكتر منك وبعد ما بنقضي وقت مع بعض بتبقى بعيد..بعيد أوي!!
كاد أن يجيبها حتى دق جرس الباب..وقف لبرهة متعجباً فهو لا ينتظر أي ضيف بهذا الوقت..التفت للفتاة وقال بشيء من العصبية: البسي هدومك
مطت "توتو" شفتيها بغيظ فكانت تأمل أن تقضي معه حتى الغد ولكن يبدو أنه غير مرحب بذلك..
لم يعير جاسر لمظهر الكثير من الانتباه وذهب ليرى من الطارق حتى تفاجئ بوقوف أبن العم "يوسف" تطلع اليه يوسف من رأسه حتى اخمص قدميه ثم زفر بأشمئزاز وقال: معاك واحدة صح ؟!
لوى جاسر شفتيه بنفاذ صبر : عايز ايه يا يوسف؟ مش بعادة تجيلي هنا؟!
دلف يوسف للداخل بعدة خطوات وترك جاسر يقف عند الباب يتأمله بضيق ، هتف جاسر بعصبية: ما تقول يابني في ايه؟!
استدار يوسف بحدة وأجاب: عمك عاملنا اجتماع بكرة وانا مش عارف اتلم على واحد فيكوا !! ضروري نفكر في السبب اللي جمعنا عشانه عشان نرتب كلامنا معاه..
اغلق جاسر الباب بحدة ثم جلس على أحد المقاعد "بالريسيبشن" واضعاً ساق على ساق وهو يشعل أحد سجائرة وقال: هيكون عايز ايه يعني !! اكيد محاضرة هابطة من محاضراته وبعدها كل واحد يرجع لحاله تاني..
تعصب يوسف من هدوء جاسر وقال: أنت هتفضل كده لحد أمتى؟!
تعجب جاسر وقال بسخرية:
_ ده على أساس أنك احسن مني؟! ما الحال من بعضه يابن عمي !! لا انت بتحب شغل الشركة ولا انا ولا حد فينا احنا الاربعة بيحب يشتغل مع عمك في مكان واحد...عمك عايز يدفنا بالحياة زي ما دفن نفسه في الشغل..عايزنا نسخة مكررة منه بس أنا عن نفسي مش مستعد..
قال يوسف بغيظ: بس مستعد تبقى كل يوم مع واحدة!! مستعدة تفضل في القذارة دي!! محدش قالك ابقى زيه بس ماتبقاش أسوء منه وتاخد مبرر لنفسك أنك تفضل في المستنقع ده!!
نهض جاسر والقى سيجارته بعصبية بالمطفأة وهتف :
مستنقع!! انا كبرت لقيت ابويا كده ، كنت بشوفه بعيني وهو بيجيب كل يوم واحدة في البيت وامي مريضة مش حاسة بحاجة!! ولما عرفت سابته وسافرت..والعيلة كلها سافرت وراها عشان تقنعها ترجع بس القدر كان اسبق من الجميع والطيارة انفجرت بيهم كلهم وهما راجعين..مالحقش يصلح شكله في عنيا..
اقترب منه يوسف وربت على كتفه بمحبة: انت بتعاقب نفسك يا جاسر عشان انت اللي قلت لوالدتك وانت السبب في سفرها..بس ده قدر...ما تحملش نفسك ذنب ماعملتهوش!
تنهد جاسر بضيق شديد وهز رأسه كأنه ينفض هذه الذكريات عن رأسه وقال: بقولك ايه انا مرتاح كده..انت عايز ايه دلوقتي؟
تنفس يوسف بيأس وقال: تعالى معايا القصر..رعد هيجي بدري انا اتفقت معاه..وآسر هدور عليه لحد ما الاقيه..
خرجت "توتو" من الحجرة بعدما ارتدت ملابسها مرة أخرى وقالت لجاسر: لما اوصل هتصل بيك يا حبيبي..هتوحشني أوي
رمته بقبلة بالهواء ثم خرجت من الشقة دون أن تلتفت ليوسف أو يلتفت لها..صمت يوسف حتى خرجت فقال بتعجب: أنت بتعجبك الأشكال دي أزاي؟! أنا بشوفها بقرف!
تعجب جاسر وقال بسخرية: أنت آخرك ابن حميدو اللي مش بتفارقه
قال يوسف بحدة: مالكش دعوة بيها يا جاسر..حميدو صاحبي أنا وبس
رمقه جاسر بسخرية وقال متوجها لغرفة النوم:
_ خليك هنا على ما اغير هدومي..
*****
بالقصر..
يقف على أعلى قممه..يشعل كومة من الخشب لتلتهب النيران بالسنة ادخنة مشتعلة..ويتذئكر ذلك الصوت الحزين لآخر شيء قاله والده قبل أن يسافر تلك السفرية اللعينة :
_ عملت المستحيل عشان اخلي أمك تحبني ومعرفتش يا آسر ، ياريتني ما حبيتها كل الحب ده..اوعى تحب يابني عشان ماتبقاش زي أبوك..اتجوز اللي تجري وراك وبتحبك بس ما تحبهاش أنت عشان ما تحسش بالعذاب اللي انا حاسه..أو ما تحبش خالص احسن..
تفاجئ آسر وهو ينظر للنيران المتقدة بأيادي على كتفه فاستدار بدهشة ليجد يوسف وجاسر ينظران له بقوة...ارتبك آسر واخفى دموع عيناه سريعاً فقال يوسف بألم:
_ احنا هنفضل كده لحد امتى؟ كل واحد مش عارف يخلص من عقدته ولا عارف يعيش حياته!! بقينا عاملين زي الوحش الغني المسجون في قصره ، لا حاسس بغنا ولا بحرية والكل بيحسده !!
قال جاسر مغيراً دفة الحديث:
_ بلاش كأبة بقى !! تعالوا نشرب فنجانين قهوة على ما رعد يجي..بقالنا كتير ما اتكلمناش يا شباب..قعدتوا منيلة بس بحبكم ياكلاب..
ابتسم يوسف وقال:
_ عمي وجيه اكيد محضرلنا مفاجأة في اجتماع بكرة
تعجب آسر من الأمر وردد باستغراب: اجتماع لينا!!
أومأ يوسف بالإيجاب وقال:
_ بالضبط..واكيد ده عشان اهمالنا في الشغل وبصراحة عنده حق ، احنا اقل واحد فينا عنده ٢٩ سنة ولحد دلوقتي مافيش واحد مننا قادر يعتمد على نفسه!! عشان كده جمعتكم النهاردة ونشوف هنقوله ايه بكرة..على ما يوصل القصر هنكون اتفقنا..
******

بأحد الأحياء الشعبية التي يركض الصغار خلف بعضهم بلهو مرح ويمررون الكرة بين اقدامهم الصغيرة..عادت حميدة لمنزلها البسيط ليهتف أحد الصغار ليغيظها:
_ أبرة طايرة في السمااا وحميدة ام كحلة هتتعمى
تعالت ضحكات الصغار عليها مرددين..استدارت حميدة بغيظ وصاحت به: لم نفسك يابو قردان أنت احسن اسرحلك شعرك بالشبشب..ولا اجيبلك سقراط أخويا يلمك؟
نظر الصغير لها بخوف على ذكر ذلك البلطجي الصغير المسمى" بسقراط" وهو طفل لم يتعدى الثالثة عشر عاماً ولكنه يفرض سيطرته على جميع صغار المنطقة..عادت وهي تتمتم بالشتائم فما كان ينقصها سوى هؤلاء الصغار أيضاً...
دلفت لمنزلها وكأنها تركض لتجد جدتها تقبض على "هون" معدني من النحاس وتصحن بمطرقة حديدية وجالسة على الأرض على "كليم" أزرق..هتفت حميدة بعصبية: بطلي بقى يا ستي صحن الكحل وتفرقيه على ستات الحته ! العيال الصغيرة بقت بتعايرني اكمن اسمي على اسمك !
رفعت الجدة حميدة رأسها الملثم بقماشة سوداء سميكة وقالت: مالك يابت داخلة ونافشة ريشك علينا ليه!! ولا عشان ما بقيتي تشتغلي شوفتي نفسك علينا!! الله يرحم المرحوم!!
ضمت حميدة شفتيها بغيظ حتى دلف أبيها "عم سمعه الميكانيكي" وهتف: صوتك طالع ليه يا حميدة..اوعي بتكوني بتزعقي لأمي يابت؟!
تماسكت حميدة وقالت : يابا هو مكنش في أي اسم قدامك غير حميدة !!
قال "سمعه" وهو يبتسم لأمه وجلس أمامها على الأرض:
_ وماله حميدة!! دي ستك دي ست الكل وحته عليها..عاملالنا ايه ياما النهاردة..
ضحكت الجدة حميدة لتغيظ حميدة الصغيرة وقالت: بصااااارة
سقف سمعه بيديه مهللا وقال ضحكة خشنة : اوعى البتنجان المحدق..أنتِ حنينة يا ام سمعة..ربنا يخليكي للمنطقة بحالها..
كظمت حميدة الصغيرة غيظها وقالت بعصبية:
_ مش عايزة اطفح ، هروح البيت التاني
لوت الجدة شفتيها وقالت لأبنها بهمس: اما يا سمعه عندي ليك حتت عروسة انما اااايه..بغاشة يا ولا
رفع اسماعيل يده بإعتراض وقال ونظرة الحزن ملأت عيناه: ولا تملئ عيني ست بعد أم حميدة الله يرحمها يأما..انسي الموضوع أنا مش عايز اتجوز..هجوز نفسي ولا هجوز عيالي !!
توقفت امه عن الصحن وقالت بضيق:
_ حقا والله يابني عندك حق..دي وداد الله يرحمها ماكنش ليها زي وكنت بحبها اكتر من بنتي وربي شاهد..انا مش هغصب عليك..لو نويت قولي وهجوزك في ظرف اسبوع..
التقطت يد أمه بمحبة وقبلها ثم رفع رأسه مبتسما وقال:
_ ربنا ما يحرمني منك ياما..
*****

وقفت سما تمشط شعرها برقة أمام المرآة بغرفتها حتى دلفت رضوى بغيظ وهتفت: ٣ساعات بتستحمي يا جربااانة !!
لم تكترث لها سما وتابعت تمشيط شعرها قائلة بهدوء:
_ ورانا ايه يعني! لا شغلة ولا مشغلة..
هتفت رضوى وهي ترفع يديها للسماء : نص برود أعصابها ياااارب البت دي هتجيبلي شلل!!
اتت جميلة إثر صوتهم العالِ ونظرت لسما بسخرية وقالت: أنتِ بتقعدي بالسعات ليه قدام المراية يا سمبوسة ؟! هتتلبسي يابت !!
أجابت سما بذات الهدوء والانتعاش:
_ بسرح شعري بهدااااااااوة ، أنتِ بقى هتفضلي مسترجلة كده كتير ؟ يابت ده أنتِ قمر وما اعرفش ايه اللي مدهولك كده !
جلست جميلة على الفراش ومددت قدميها قائلة: ماهو عشان أنا قمر ماينفعش أبين كده ، هيطمع فينا يا غبية واحنا مالناش حد يحمينا من ولاد الحرام...
قالت رضوى: لينا ربنا احسن من الكل
أخذت منشفة قطنية ثم توقفت فجأة.. وهي تتشممها: أنتِ بتسرحي شعرك بإيه يابت ياسمبوسة ؟!
ابتسمت سما بثقة: صابونة صن لايت اللي بتغسلي بيها وشك
هز رضوى رأسها بتفهم وقالت: وأنا بقول الريحة المعفنة دي جاية منين!
استدارت سما بغيظ وهتفت: ريحة شعري معفنة يا كدااابة !!
تمايلت وهي تهز شعرها الطويل يمينا وشمالا بغنج ثم قالت بثقة وفخر: ده البت نانا بتاعت الكوافير هتموت وتعرف بحط عليه ايه عشان يبقى ناعم وطويل كده..
فردت رضوى شعرها الذي ماثل شعر سما في طوله ونعومته وقالت: مش لوحدك ياختي..بلاش آلاطة وحياة والدك..
ركضت سما خلف رضوى لتمسكها فهرعت رضوى ضاحكة الى الحمام ثم توقفت سما عن الضحك أيضا وتركتها..جلست على الفراش ولاحظت أن جميلة تبدو شاردة فقالت بتساؤل:
_ مالك يابت تيهة كده ليه؟! حد زعلك في الشغل!
تنهدت جميلة بعمق وأجابت: مشيت من المصنع
حملقت سما بها بصدمة وقالت: ليييييه؟!
احتدت نظرة جميلة وصاحت بغيظ: مرات صاحب المصنع حطاني في دماغها ،تشوفني كأنها شافت عفريت ، فضلت تقرفني في الشغل لحد ما طفشت من نفسي..
قالت سما بكره: البت المعصعصة دي! حقها تغير منك بصراحة ، ده أنتِ بتلبسي لبس زي الرجالة ومع ذلك قمر وهي بتنام بالروچ ومالهاش منظر .
ضحكت جميلة رغما عنها من انفعال سما الذي يشبه صياح الأطفال وقالت: ضحكتيني وانا زعلانة
ضحكت سما وقالت: اضحكي اضحكي محدش واخد منها حاجة بكرة تلاقي شغل احسن منه وهفكرك..
اتت حميدة وعلى ملامحها الضيق لتتساءل سما بتعجب: مالك أنتِ كمان ؟!
قضمت حميدة اظافرها بغيظ وتمتمت وكأنها تحدث نفسها: آآآآآه بنت ال ....لو طولتها ، كنت هخرطها بسناني
قالت جميلة بدهشة: مين يا حميدة ؟!
قالت حميدة بغضب: واحدة وشها مالوش ملامح اصلا وعاملة نفسها الأميرة سوسن!!
عقدت سما حاجبيها وتساءلت: مين الأميرة سوسن دي؟!
نظرت حميدة لها بغيظ وهتفت بصريخ: وانا ايش عرفني !!
صمتت سما بتوجس من صياحها لتعيد جميلة السؤال: يابنتي قوليلنا ماااالك؟!
روت لهم حميدة ما حدث حتى قالت سما بهيام: بتحبيه بقى!!
دفعت حميدة الوسادة بوجهها وقالت: مش عندي مرارة ليكي يا زفته ومش فيقالك..انا متغااااظة
قالت جميلة بعدوتفكير: وتتغاظي ليه يا عبيطة ماهو سابها ورجع قعد جانبك وجابلك حقك كمان ، هو اكل وبحلقة!!
قالت حميدة بضيق: تقصدي يوسف!! لا خيالك ما يروحش لبعيد..ده بيعتبرني راجل زيي زيه بالضبط..ده عمره ما قالي يا حميدة ودايماً يقولي يا حميدو لدرجة أن زمايلي بقوا يقلولي زيه!!
اخفت سما ضحكتها حتى دفعتها حميدة واوقعتها على الأرض بغيظ لترتفع ضحكت سما أكثر وقالت: بقى كده يا حميدو !!
جاهدت جميلة أن لا تضحك وحاولت أن تمنع حميدة من اللحاق بسما المنفجرة بالضحك على الأرض وقالت: خلينا في المهم دلوقتي..
جلست حميدة بزفرة حارة وقالت: طريقة عمه معايا ما تطمنش ، ممكن جدًا الاقي نفسي برا الشركة في لحظة..
ربتت جميلة على كتفها وقالت: سبيها على ربنا وماتفكريش فيها ، اللي حصل حصل وخلاص!!
هزت حميبدة رأسها وقالت: عندك حق..تفكيري لا هيقدم ولا هيأخر..بقولكم ااايه تعالوا نشرب عصير قصب ونشم شوية هوا انا مخنوقة..
قفزت سما بحماس وقالت: هروح البس حاااالًا
ابتسمت جميلة وشاركتها حميدة فسما دائماً تتصرف كالأطفال..
*********
وقف سقراط وسيط مجموعة من سائقين"التوكتوك" يخبرهم بأحد مغامرته وقال: وبعد ما ضربت ٣من العصابة هوووب لقيت خمسة
قال أحد الرجال بفضول وحماس: هااااا حصل ايه يا وحش؟
أشار سقراط بيده وكأنه يستعد للقتال ثم قال: خلعت الساعة وحطيتها في جيبي..
من حوله بنفس واحد وبإندماج: وبعدين!
تابع سقراط: قلعت الشبشب..اومال هتعارك بيه! يتقطع
اضاف وهو يوسع عيناه وكأنه يرى غول: يقوم الخمسة يهجموا عليا مرة واحدة وانا طاااااخ طااااخ طرااااخ وقعتوهم كلهم على الأرض بإيد واحدة..
قال أحد الشاب بذهول: خمسة بإيد واحدة؟!
هز سقرتط رأسه مجيباً: ومن غير ما اتحرك..اصلهم خافوا مني وانصدموا لما شافوا جسمي
نظر الشاب لجسد سقراط الضئيل ليتلع نظرتهم بقلق وصحح: لأ ما انا بخلع القميص وبسقع عضلاتي بتتنفخ...
قال أحدهم بسخرية: المفروض يتعملك تمثال في الحتة دي..
وأشار تحت قدم سقراط..
كاد سقراط أن يجيبه حتى انتبه لصوت شقيقته الكبرى : يااامنيل
اشار لها لتصمت ولا تناشده بهذا الاسم ولكن حميدة لم تكترث...وقف أمامها قائلاً بحدة: عايزة ايه؟!
قرصته من أذنه بغيظ وقالت: مش قولنا بلاش واقفة مع دوووول وتروح المدرسة ؟! أنت حرررر هتطلع بصمجي وعرة
دفع يديها بعصبية وقال: أنا عايز أصرف على نفسي مالكيش دعوة يا بومة
كتم الفتيات ضحكاتهنّ لتوكزه حميدة بغيظ وركض من أمامها...تابعوا السير بالطريق حتى انتبهت رضوى لأحد الأبنية الفخمة التي كانت سوبر ماركت قديم بالماضِ وقالت : ده هيتقلب صالون تجميل!
نظرت حميدة للوحة خشبية مستندة على الحائط وقالت بعدما قرأت ما منقوش عليها : معقول!! ليليان يوسف هتفتح صالون تجميل في حارتنا الزبالة دي!! دي اكيد اتجننت!!
قالت سما بحماس: بالعكس دي زكية جدًا ، مكان مش غالي وهتشتغل فيه شغل عالي هيكسبها دهب ، دي أشهر ميكب ارتيست في مصر!!
تدخلت جميلة بالحديث وقالت ساخرة: طب يلا ياختي منك ليها ، مش عارفة بتتكلموا على ايه انتوا اساساً مش هتعرفوا تعدوا من هنا تاني مش تروحولها!!
قالت حميدة: والله عندك حق ، قال يعني هتشتغل للناس الغلابة اللي في الحارة دي اقل حاجة عندها بيدفع فيها الافات..
تركوا الفتيات المكان وهم يتشاركون أطراف الحديث..

الجزء الثاني

على ساحة عريضة من الطريق..يوجد محل بائع"عصير القصب" يسكب المشروب من آنية معدنية قد سحبها من أسفل صنبور العصير بالمكينة الكهربائية للعصر..فأعد أربع أكواب للفتيات فأخذت كلنّ منهنّ كوبها..أتى شاب بنظرات ماكرة بإتجاه جميلة وطلب كوب له قائلًا:

_ عندك واحد ليا وحساب القمرات دول عليا.

التفت الفتيات له حتى حدجته جميلة بغيظ: ماتخليك في حالك يا مصيلحي بدل ما انسر شبشبي على نفوخك!!

قال مصيلحي وهو يتوجه لها خصيصاً: يابت أنا شاري بس أنتي اللي دماغك جزمة..قولي آه بس وأنا اعملك فرح بِفراشة ما اتعملش لاستقبال المحافظ نفسه..طالع من عيني العنب ده يروح لغيري.

وضعت جميلة كوبها بعصبية واعطت العصار حقه من محفظة نقودها ثم التفتت ل"مصيلحي" هاتفة بتحذير:لآخر مرة هنبهك بعد كده..

قاطعها بتحدي: هتعملي إيه يعني؟! مين اللي هيوقفلي عندك !! هو أنتي ليكي حد اصلاً!

أطرفت جميلة عينيها بدمعة اخفتها حتى هجم عليه الفتيات واوسعوه ضرباً حتى تجمع الحشد حولهم فهتفت حميدة بغضب: لو عايز تعرف ليه مين يا صايع هنوريك احنا..

لكمته سما على قفاه وقالت وهي تشد أذنيه بغيظ: بقى أنت عايز تتجوز جميلة يا راس الفجلة أنت..

هتفت رضوى بهم وقالت: لا ده تسيبهولي بقى

أخذت معصمه وهو يتأوه من ضرب الفتيات ثم غرزت اسنانها بلحم يده حتى صرخ بأعلى صوته فهتفت جميلة بهم وقالت: سيبوه بقى يغور في داهية..

بالكاد استطاع أهل المنطقة تخليصه من أيدي الفتيات حتى أتى الأسطى سمعه"والد حميدة" راكضاً وتساءل: في ايه ؟!

قصت حميدة له كل شيء فوقف أمام "مصيلحي" بغضب وقال:

_ عشان خاطر أبوك الله يرحمه هسيبك بس لو حصلت تاني واتعرضتلها فقسما بالله محد هينجدك من ايدي..

نظر مصيلحي للنظرات الغاضبة حوله فحاول أن يصحح ما حدث وقال: براااحة ياأسطى هو أنا خطفتها!! شاريها وهي تقلانة عليا..

صاحت حميدة بعصبية: مش بطيق تبص في خلقتك هو بالعافية يا حمار !!

وجهت الحديث لأبيها بحدة وقالت: ده مترصد للبت في الرايحة والجاية وكل ما تهزأئه يزيد اكتر..والله لو بصلها تاني لكون جيباه من قلب بيته باللي في رجلي وافرج عليه أمة لا إله إلا الله.

هتف اسطى سمعة بأبنته وقال: خدي البنات وارجعي أنتي يا حميدة وأنا هعرف اخليه لو شافها في شارع يمشي من شارع تاني.

أخذت حميدة الفتيات بنظراتهنّ المتقدة غضب وتوجهوا للمنزل مرة أخرى..سارت جميلة بالطريق الذي تملأه الأحجار وبعض مياه الصرف الصحي دامعة..خيم الصمت على الفتيات فكل واحدة منهن تعاني من اليتم..حتى حميدة يتيمة الأم..

دلفوا لداخل المنزل الذي يقطنون به وصعدوا للطابق الثانِ...فاجئتهم جميلة وهي تتابع الصعود "للسطح" فنظر بقية الفتيات لبعضهن بضيق وقالت حميدة لسما: بت..روحي هاتيلنا حاجة ساقعة ولب نتسلى فيهم..ابقي حصلينا على السطح

فرت سما كالطيف للأسفل مرة أخرى حتى تبتاع المطلوب سريعاً بينما صعد حميدة ورضوى خلف جميلة..

مرت دقائق والفتيات الأربعة ممددين على "حصير" مفروش على أرضية سطوح المنزل..كلًا منهما شاردة..قالت حميدة بمواساة:

_ ولا يهمك يابت..كلنا جانبك..

تنهدت جميلة تنهيدة عميقة وقالت: دايمًا بتشاف أني لوحدي..ماليش حد يحميني..زي حتت اللحمة اللي وقعت وسط كلاب عايزين ينهشو فيها..

قالت رضوى بنبرة ضائقة: ومين سمعك..ما كلنا في الهوا سوا..ده لولا خالتي بهية الله يرحمها لقيتنا وربتنا الله وحده اللي عالم كان هيحصل لينا ايه!!

قالت حميدة بتذكر عمتها بهية فهي شقيقة والدها وكانت تحب تربية الأيتام وتركهنً بعدما يبلغوا سن الرشد ولكن صادف أنها توفت قبل أن يصل هؤلاء الثلاث فتيات للسن المسموح به لأثبات الهوية الشخصية: الله يرحمها عمتي..كانت معوضاني عن أمي بس هي كمان راحتلها..

قالت سما بتبرم: أنا مابحبش النكد..ايه القرف اللي انتوا فيه ده!!

نظرت للسماء بابتسامة واغمضت عيناها قائلة: تعالوا نحلم احسن..نقول اللي نفسنا فيه..مش يمكن يكون باب السما مفتوح واحلامنا تتحقق بغمضة عين!!

ابتسمت رضوى وقالت: والله عندك حق يابت يا سمكة..تعرفوا أنا نفسي ايه..نفسي اشتغل شغلانة حلوة..اسافر واروح واجي واشتري كل اللي نفسي فيه..

قالت حميدة بشرود وهي تتذكر يوسف: وأنا نفسي يوسف يشوفني زي ما انا نفسي يشوفني..نفسي يبطل يعاملني أني صاحبه!! نفسي أشوف في عنيه أني عجباه كبنت..

تنهدت جميلة مرة أخرى وقالت: وانا نفسي في بيت صغير أنا مش طماعة..ويبقى ليا أسرة وبيت احس أنه حياتي كلها..نفسي اجرب احساس أني مسؤولة من حد وحد مسؤول مني..مش عايزة افضل لوحدي..تعبت من الخوف

فردت سما ذراعيها وقالت: أنا بقى طماااااااعة..نفسي أعيش قصة حب ولا الحواديت..الأمير على حصانه الأبيض..يجي ويخطفني من وسط كل الناس..ويكون بيحبني أوي..بيحبني بجد..وبيغير عليا بغباوة..ويتكلم عني ويقول أني حبيبته الوحيدة..وأنا بقى اتقل عليه

ضحكت سما بمرح وهي تتخيل الفارس المجهول..ليشاركها الفتيات بمرحها..فقالت جميلة متعجبة: أنتي ليه ما حاولتيش يا حميدة تلفتي نظر يوسف ليكي؟!

صمتت حميدة لبرهة في الأجابة ثم قالت:

_ أنا بحب نفسي كده يا جميلة، بحب شكلي وبحب نضارتي، صدقيني حاولت في مرة اتغير بس محاستش أني مرتاحة وهو مخدش باله كمان..يوسف انسان محير وغريب..لحظة تحسيه طفل ولحظة تانية تحسي أنه فاهم كل حاجة ومخبي ولحظة تالته تحسي أني بعيد بعيد عن تفكيره أميال..الشكل لوحده مش هيلفت نظره بدليل أن معايا بنات زمايلي انا نفسي بستغرب هو مش بيبص ليهم أزاي !!

أنا بنت عادية..لا الهدوم هتزود جمالي ولا مظهري مقلل مني..ولو اتمنيت أنه يحبني فلازم يحبني وانا زي ما أنا..

وافقتها جميلة بذلك لتقل سما بإعتراض: طب أفرضي اتجوزتيه هتفضلي على رأيك ده؟! تبقي غبية! ساعتها الاهتمام والشكل مطلوبين جدًا..

لوت حميدة فمها وقالت بسخرية: اتجوزته!!! ده لو بس قالي كلمة حلوة في يوم هعتبرها معجزة..

قالت رضوى: محدش عارف بكرة في ايه..يمكن بكرة هو اللي يتمناكي!!

❤❤❤❤❤❤ ********الصلاة على النبي❤

❤❤بقصر الزيان❤❤

كانت ستارة النافذة تتمايل بفعل الهواء بينما حل الصمت على أبناء العم الأربعة بعدما تحدث يوسف بكل مخاوفه فتابع:

_ مقدمناش حل غير أننا نرجع الشركة ونشتغل بجد..مش اسبوعين وشكراً زي ما بيحصل كل مرة..

قال آسر بضيق: أنا مابحبش شغل الاستيراد والتصدير أنا بحب المقاولات ودخلت هندسة مخصوص عشان ابقى زي أبويا.

نهض رعد من مقعده بغيظ وقال: أنا مش شايف أني عاطل ولا شايف أن التصوير شغلانة تافهة زي ما عمك بيقول..أنا بحب الكاميرات والتصوير ومش هعرف اشتغل غيرها..

أجابه يوسف بصدق: ده لو أنت قدرت تعمل بمرتبك حاجة يا رعد ، لكن كل فلوسك موجه للكاميرات والسفر في الجبال للتصوير..تقدر تقولي حسابك في البنك بيزيد ولا بينقص بسبب التصوير! هتقدر بالشكل ده تكون مسؤول عن أسرة في يوم من الأيام؟!

تابع يوسف :

_ أنا مش احسن منكوا ، أنا فعلًا بعترف بده ، واننا بقالنا سنين راميين الحمل على عمي وكل واحد فينا عايش حياته بطريقته..

رد آسر بدهشة: والمطلوب مننا ايه دلوقتي؟

نظر لهم يوسف بقوة وقال: نعتذرله..حتى لو هنتحايل شوية..ونبدأ صفحة جديدة معاه..الاجتماع ده اكيد وراه قرار مش سهل..نبدأ احنا بالاعتذار عشان تعدي على خير..

صمت الشباب بوجوم ولم يجيب احداً فيهم ليقل يوسف:

_ طالما سكتوا يبقى مش معترضين..تمام..كده اتفقنا..

قال جاسر بمرح: نحتفل بقى..

❤❤❤❤❤❤*******استغفر الله العظيم

باليوم التالي...بمكتب فاروق بشركة **آل الزيان**

وقف الرباعي أمام العم "وجيه" متصافين بجانب بعضهم ليتوجه سليم إليهم بنظرات غيظ وهتف:

_ بالذمة مش مكسوفين من نفسكم؟! أربع شباب كل واحد فيهم شبه الجدار ومالوش أي لازمة في الدنيا !! ، شاطرين بس تاخدوا فلوس وتصرفوا ! ده أنتوا لو بنات كان افيد!!

امتقع وجه آسر بضيق شديد بينما لوى رعد شفتيه وهمس لجاسر وقال:- عمك بيهزأنا يا جاسر..استخدم غباوتك بسرعة

وكزه جاسر متمتما بشيء وقال: غباوة مين اللي تنفع مع القطر ده ! انا اخري ميكروباص وفاضي كمان

تقدم يوسف وتوجه لعمه وجيه ثم قبّل كتفه ببسمة وهتف بباقي الشباب:- يلا قولوا النشيد اللي سرقناه..ااقصد اللي الفناه لعمنا حبيبنا

بدأ الشباب يرددون الكلمات رغماً عنهم مابين الضيق والضحكة المكتومة فقالوا : عمو وجيه يا عمو وجيه ، حياتنا من غير هتبقى جحيم ، ابعد بس وجرب وأمشي هتلاقي الدنيا متنفعش ، كلنا ايد واحدة آه آه وبنحبك والله والله

كاد رعد أن يطلق ضحكة عالية فوضع جاسر يده على فم ابن عمه سريعاً وهمس: هتفضحنا خلينا نخلص من إذاعة الصباح ونمشي

فتابعوا بآخر مقطع : أوعى ياعمو تسيبنا وتمشي لأ لأ

قال رعد وهو يكتم ضحكته : تبقى معدية

ردد يوسف :- متسلمش عليا..يااااااسااافل

قالها وقد تحكم بنفسه ولا زال آثر على ضيقه وقف يوسف موازيا للصف ليقف أمامهم بمكر وقال : المرادي مفيش عقاب

صافح الشباب بعضهم ببهجة وابتسامة وهم يتلقوا التهاني حتى قال وجيه فجأة:- في طرد

توقف الشباب فجأة كالتماثيل فالتفت يوسف اليه بفم مفتوح وقال : ها؟

لوى جاسر شفتيه بسخرية وقال:- أنا طردت نفسي من زمان وليا شقتي اللي عايش فيها لوحدي

وكزه رعد بخبث وهمس:- لوحدك يا كداب !

أجابه جاسر بخفوت:- تقصد توتو ؟ لأ دي سافرت..جبت مكانها كاريمان حتت بت مانجا

ضغطت رعد على شفتيه بغمزة ماكرة فابتسم جاسر بثقة

قال آسر بكبرياء:- حاضر يا عمي اللي أنت شايفه

هتفت يوسف بغيظ: مش وقت كبريائك خالص دلوقتي ، بيقولك طرد يعني مش هنتعشى !!

ابتسم وجيه رغما عنه وقال : لأ ومش بس من القصر..ده من هنا كمان

اكفهر وجه جاسر وهتف: طب وهصرف على حريمي منين

كتم يوسف فم جاسر وصحح: هدومي..يقصد هدومه يا عمي ماتفهموش صح..

أضاف العم متأملاً أبناء أشقائه بعمق وقال:

_ اديتلكم فرص بعدد شعر راسكم وانتوا مصممين تفضلوا كده..قراري هو أنكم هتتعاقبوا لمدة سنة..لا ليكم علاقة لا بالشركة ولا بالقصر واما حصتكم في الأرباح هتكون محفوظة لكن متجمدة لحد ما السنة تنتهي..عايز اتفرج عليكم وانتوا بتشحتوا ومش عارفين تصرفوا على نفسكم..يمكن ساعتها تعرفوا قيمة الشغل..

نظر له الشباب بحدة وغضب مكبوت فختم وجيه قوله:

_ أنا عارف أنكم هتفشلوا اكتر من الأول وعمركم ما هتعتمدوا على نفسكم وتبقوا رجالة أبدًا..تقتدروا تتفضلوا..محدش يدخل هنا غير بعد سنة واتمنى تلتزموا بالقرار ده حتى لو جرالي حاجة..محدش عارف بكرة في ايه..

قال آسر مؤكداً: فعلًا محدش عارف بكرة فيه ايه!! بس لو جينا واحنا ناجحين ؟

قاطعه وجيه بتحدي: هعمل مؤتمر كبير واتنازل عن منصبي ليكم انتم الأربعة قدام الدنيا بحالها..ولأني عارف أن ده مش هيحصل بتحداكم وانا مرتاح..انتم فشلة!!

خرج جاسر من المكتب بغضب يقتدح بمقلتيه وتبعه بقية الشباب واحدا تلو الآخر..

وقف الموظفون على الجانبين عندما خرج أبناء عائلة الزيان الثلاثة خلف بعضهم وكأنهم يهرعون لقتال محتد..بينما وقف يوسف خارج المكتب بحيرة فاقترب منه حميدة بقلق متساءلة:

_ حصل ايه؟ شكل ولاد عمك ما يطمنش!

نظر اليها يوسف بضيق وهم : انطردنا..مش هتشوفني تاني يا حميدو!!

لأول مرة تغاضت حميدة عن ما يضيقها بمنادتها وكأنها رجل وانشغلت بكل تركيزها بالمصيبة الكبرى..تمتمت بصدمة:

_ اتطردت!! يعني مش هتكون هنا !!

هز يوسف رأسه بنفي: لأ طبعاً..ده كمان أنا ممنوع ادخل هنا غير بعد سنة كاملة..معتقدش أن حتى بعد السنة انا ممكن اجي هنا تاني

تركها واقفة ورحل..أصبح وجه حميدة شاحباً كالأموات بينما عندما خرجت من تيهتها لم تجده أمامها!! تلألأت الدموع بعيناها وركضت باحثة عنه وتخلت عن النظرة المنبعثة من الأعين بأستفسار هذه الأدمع بعيناها..

❤❤❤****لا إله إلا الله

دخل كل شاب سيارته وانطلق بالطريق دون حديث مع الآخر..بينما ركضت حميدة لخارج الشركة تتعارك مع الوقت لتلحق بيوسف..علها تنظر اليه وتشبع قلبها الذي انشق شوق ولهفة ولكنه رحل منذ ثوانِ..وقفت بمنتصف الطريق باكية وشعور مؤلم بأنها لم تراه مرة أخرى...

عادت لمنزلها فلم تستطع المواصلة بالعمل..لاحظ عليها أبيها هذا الشرود ولكنها بالطبع لم تخبره وكيف تخبره وأي شيء تخبره به؟ فهي أحبت ويبدو أنه من طرف واحد..

ولجت لغرفتها مباشرةً..وارتمت على الفراش واجهشت بالبكاء :

_ كده يا يوسف!! في لحظة زي دي لو كنت بتفكر فيا ولو بسيط كنت على الأقل قلت حاجة..حتى لو سلام..لأول مرة اتمنى أنك كنت تعتبرني صاحبك وفراقي غالي عليك..مشيت وسيبتني وقررت تبعد كمان ولا همك!!

.......بالمساء.......

فتح جاسر باب شقته ليجد يوسف أمامه بوجه ممتقع ونظرة منكسرة فقال جاسر: ادخل يا يوسف ، آسر ورعد هنا

دلف يوسف وهو يتقدم خطوات للداخل بإنهزام حتى وقعت نظرته على آسر الجالس شارداً بغموض ورعد الذي يكور قبضته على ذراع المقعد وكأنه سيتشاجر مع أحد..أغلق جاسر باب الشقة وقال:

_ أنا ما اتصدمتش كتير..لأني عارف عمك وعارف أنه عنيد

رد يوسف بضيق: ما تخيلتش أنه يعمل فينا كده، يعني مش بس من الشركة لأ من القصر كمان..صدمني فيه

نهض آسر بنظرة متحدية:

_ أنا قررت أننا نتحداه..هو قال علينا فشلة وطردنا..فاكرنا هنرجع ونتذلل بس لو واحد فيكوا هيعمل كده مش هعرفه تاني..

نظر رعد بحدة وقال: نتذلل!! ده مستحيل..أنا مش راجع القصر نهائي لا بعد سنة ولا بعد عشرين..

أضاف جاسر: طب وبعدين؟!..اكيد محدش هيرجع يتحايل بس كمان ما تنسوش أننا عايشين من الفلوس اللي بيحطهالنا في البنك..

جلس يوسف محاولًا التفكير بشيء فقال آسر بشكل حاسم:

_ خطوة كنت بفكر فيها وجه آوانها..أنا هفتح مكتب مقاولات صغير نقدر نشترك فيه كلنا ،لو نجحنا في خلال السنة دي هنرجع بعد سنة كل واحد ياخد نصيبه ويفتح مشروع ليه..اظن مافيهاش حاجة لو ضغطنا على نفسنا سنة واحدة بس ونسينا العز اللي عشنا فيه السنين اللي فاتت..

نظر يوسف له بأهتمام وقال: فكرة هايلة ،أنا شايف أنها الحل الوحيد الللي قدامنا..

رعد بتأفف: طب وشغلي؟!

أجاب يوسف: تقدر تواظب بين الاتنين..احنا هنكمل بعض

ضيق جاسر عيناه بتفكير ثم سأل: طب والمكان؟ والموظفين! ورأس المال؟

شرح آسر: عمك هيقدر يتحكم في الأرباح اللي لسه هيبعتها البنك لكن حسابنا ده خاص بينا..

جاسر بسخرية: رصيدنا كلنا كام يعني؟ انا عن نفسي مصرف جدًا ويدوبك اللي كان بيتحط كان بيقضيني واظن انكم زيي!! عمي وجيه عرف يلعبها صح للأسف..

قال يوسف بحماس: نبيع عربيتنا ،مانسيبش بس غير واحدة لينا كلنا..والشقة دي ممكن جداً تبقى المكتب..٣ أوض مكاتب والمكتب الرابع هخليه في الصالة هنا مش مشكلة..انا هرتبلكم المكان

قال رعد بتفكير: فكرة مش بطالة..معنديش مانع طالما شغلي مش هيتأثر..

رفع جاسر حاجبيه بذهول: شقة ايه اللي هتبقى مكتب !! اومال هنقعد فين؟! أنا لحد الفكرة وموافق لكن أن شقتي تبقى مكتب فأسف..مقدرش

وقف آسر بعصبية وقال: ومافيش ميزانية معانا تكفي أننا نشتري أو حتى نأجر!! لو عندي شقة كنت استخدمتها فورا يا جاسر..وأنت بالذات محتاج تثبت لعمك أنك مش مستهتر وفاشل وبتاع بنات..ارجوك ..اررررجوك وافق متوقفش الموضوع كله على حاجة زي دي..

قال يوسف بلطف: فكر يا جاسر لما ننجح هيكون شكلنا ايه قدامه..فكر أنه وعد لو رجعناله ناجحين هيتنازل عن منصبه وساعتها انا عن نفسي مش هقبل يتنازل لأنه عمي برضو وماحبش انه ينهزم لكن هنسحب وانا ناجح ومش خسران..أنا عجباني فكرة آسر جدًا وموافق عليها..

رد رعد بموافقة: وانا كمان موافق

زفر جاسر بغيظ وقال: هي جت عليا يعني..خلاص موافق!

******الله أكبر

مر أكثر من أسبوعان في تحويل الشقة لمكتب على هيئة شركة صغيرة..وقف يوسف بابتسامة متسعة بالردهة التي رتبت بالمقاعد الجلدية ومكاتب على أطرافها وقال: كده تمام أوي ، جاهزة على الشغل..

جلس آسر بعدما انهى عدة أتصالات تخص بعض العملاء التي عرض عليهم العمل ووافقوا على مضض وقال:

_ هنتعب شوية في الأول بس أنا حاسس اننا هننجح

ابتسم له يوسف وقال: فاضل بس نجيب طقم سكرتارية وساعي للمطبخ وكده تمام..

أجاب آسر بتحذير: فكرتني..كويس أن جاسر ورعد مش هنا..بخصوص طقم السكرتارية..أنا عايزهم رجالة مش بنات

حملق يوسف به بدهشة: رجالة!! وولاد عمك هيوافقوا ؟! مستحيل

عقد آسر حاجبيه وقال: لو جبت بنات فتأكد اننا مش هنشتغل وانت عارف طبعا جاسر ورعد !!

جلس يوسف بجانبه مفكراً وقال: بالنسبالي فعارف أنا هجيب مين لكن المشكلة في الباقي!

ضيق آسر عيناه لدقيقة ثم قال فجأة:

_ لقيتها..مش هنجيب رجالة..بس عايز سكرتيرات يعني...زي حميدو كده..

احتدت نظرة يوسف وهتف: وبتجيب سيرتها بالغلط ليه بقى دلوقتي؟

هز آسر رأسه بنفي وقال: ما غلطش يابني بالعكس..النوعية بتاعت حميدة دي مستحيل جاسر أو رعد يبوصلها...عشان لو جبت رجالة فبأكدلك أنهم مش هيقعدوا هنا ساعة واحدة انما لو زي حميدة اهو الوقت هيعدي من غير مشاكل..

صمت يوسف مفكرا وقال: خلاص..انا هسيب المهمة دي لحميدة بقى.

*****الحمد لله

دلفت حميدة والهالات السوداء تحت عيناها من كثرة البكاء طيلة الأيام الفائتة الى مكتب "وجيه الزيان" بناء على طلبه..دلفت حتى أصبحت أمامه وتفحصها بشك: قدمتي استقالتك ليه؟!

صمتت حميدة ونظرت للأسف وودت لو القته من النافذة حتى عاد حديثه بحدة:

_ عشان يوسف مشي صح؟ أوك..استقالتك مقبولة...برا

نظرت له بغضب اتيح له الفرصة بما انها قد طردت:

_ أنت مش بني آدم!! في حد يطرد ولاد أخواته بالمنظر ده ؟! أنت أزاي مش قلقان عليهم ؟! أزاي بيجيلك نوم؟!

أطرق وجيه على مكتبه بغضب وأشار لها لتخرج:

_ أخرجي برا قبل ما ابعتلك الأمن يخرجك!! أنتي مين عشان تكلميني بالشكل ده ؟! تعرفي ايه عني؟ أخرجي برا قبل ما اتهور

نظرت له بكره وقالت:

_ انا اللي قدمت استقالتي لأني ماحبش اشتغل عند واحد مايعرفش يعني ايه رحمة!! سلام

خرجت حميدة من المكتب وصفقت الباب خلفها بكل قوتها وعن قصد ثم التقطت حقيبتها سريعاً وركضت للخارج..

انسابت دموعها على خديها بغزارة..اشتاقت له بجنون وتمنت أن ترى حتى طيفه..حتى كادت أن تصعد لحافلة بالطريق فرأت بائع "الذرة المشوى" على الرصيف..تذكرت أن يوسف يحبه كثيرا غمرها الحنين رغما عنها فذهبت لتبتاع من البائع..فما أن انتهت حتى اخذ يوسف ما بيدها بضحكة عالية:

_ حميدووووووو...واااااحشناااااي

تسمرت حميدة للحظات ثم اتسعت ابتسامتها ببطء وصدمة وهي تردد: ي..يوسف!!

قضم يوسف من "كوز الذرة" بنهم وقد عادت النظرة المرحة الطفولية لعيناه وملامحه الوسيمة فأجاب: هو بعينه..تعرفي..من يوم ما سيبت الشركة ومابقتش أشوفك..وانا باكل برضو

اتسعت ابتسامتها ووظت لو تبكي وترتمي بين ذراعيه فتابع بضحكة: بس من غير نفس والله يا حميدو

قالت بحدة: برضو حميدو؟!

أجاب يوسف بعفوية: أنا بعتبرك صاحبي..عشان خاطري سبيني كده والله ببقى مرتاح كده..شوفتي كنت هنسى..عايزك في موضوع مصيري..

دق قلبها بجنون فأي شيء أتى اليه مخصوص؟! قالت بخجل وتوتر: موضوع ايه؟

شرح يوسف الأمر لتنسحب فرحتها المؤقته رويداً ولكن تبقى شيء جعلها تطمئن أن يريدها معه بمكانٍ آخر ،اخترها هي لا غيرها ! قالت بنظرة عاتبة: أنا قدمت استقالتي النهاردة..وعمك قبلها

قال يوسف بفرحة: طب كويس..كده أنتي جاهزة تبقي معايا

قالت بقلب يتمنى: معاك يا يوسف

ابتلع يوسف ما بفمه بشهية واضحة وأضاف:

_ طب والباقي؟ انا عايز ٣سكرتيرات زيك بالضبط ، يعني اقصد انهم محتشمين و

قاطعته فقد فهمت مقصد من التواء الحديث: فهماك..تقصد عايزهم نسخة من حميدو ابو اربع عيون

لوى شفتيه بتذمر وقال: مش اقصد ازعلك والله ، أنتي الوحيدة اللي جيتي في بالي وعقلي وقف عليكي والله..

جملته اربكتها واسعدتها بآنٍ واحد فقالت بحماس: سيب الموضوع ده عليا..بس اديني اسبوع كمان وعايزة لاب توب

يوسف بتساؤل: ليه؟!

أجابت فريدة: عشان اعلمهم شوية حاجات كده قبل المقابلة

وافق يوسف على الفور فقال: ماشي..بكرة زي دلوقتي نتقابل هنا

❤❤❤❤ ****** صلِ على النبي

عادت حميدة للمنول والسعادة تغمرها ثم ذهبت للفتيات مباشرةٍ لتخبرهم...بعد شرح ومناقشة ابتسمت رضوى وقالت:

_ ايه ده ؟ بقى اطلب من ربنا شغلانة حلوة تقوم الأمنية تتحقق بالسرعة دي؟!

جميلة بقلق: بس احنا برضو تعليمنا على ادنا يا حميدة؟!

سما وهي تسير بخطا متمايلة: اكيد هقابل فارس الأحلام بقى وهعيييييش..

هتفت حميدة بها: أنتي بالذات قلقانة منك يابت! اركزي شوية وبعدين المطلوب مننا كلنا واولهم أنا..اننا مانتعاملش غير جد أو اكتر شوية..

عقدت رضوى حاجبيها وتساءلت بدهشة: يعني ايه؟!

وقفت حميدة أمام الفتيات بنظرة متفحصة وهي ترفع إطار نظارتها الطبية على أنفها وقالت:

_ يعني الصوت الناعم ممنوع..الابتسامة ممنوع ، النظارات ما تتقلعش ، احنا نعتبر في الجيش.. ليه بقى؟

نظرت للفتيات تراقب تعابيرهنّ فلاحظت المقت والوجوم على ملامحهنّ فأضافت:

_قولتولي ليه..عشان أي مياعة أو رقة الجيش هيتقلب لكافيه على النيل وأنا بصراحة بحب كده بسسسسس مش وقته خالص ، ماينفعش نحب حد فيهم ، ماينفعش نعاملهم على أننا بنات ، عشان جاسر ولا رعد ولا حتى آسر لو حاسوا برقتكم يبقى هالله هالله على اللي هيحصل ، انما يوسف ده أصلًا تنين صغير عايش واتولد في صنية بطاطس ومش عارف يطلع منها..اللي هشوف سنانها وهي بتضحك هديها بضهر إيدي على خلقتها..

رواية امبراطورية الرجال الجزء الثاني